Stuðningur við börn og fjölskyldur

Öll þurfum við aðstoð annað slagið. Hvort sem það er við helstu athafnir daglegs lífs, eða til að vera betur í stakk búin að taka þátt í samfélaginu. Börn og fjölskyldur þeirra geta fengið fjölbreyttan stuðning til að mæta þörfum vegna félagslegra aðstæðna, álags, veikinda eða fötlunar.

Að hverju snýr stuðningurinn?

Foreldrar og forsjáraðilar geta þurft stuðning við:

Að sinna uppeldis- og foreldrahlutverki sínu
Að taka virkan þátt í samfélaginu
Að halda heimili
Að styrkja stuðningsnet sitt
Að byggja upp sjálfstraust

Börn geta þurft stuðning við:

Að taka virkan þátt í samfélaginu
Að eiga góð og uppbyggileg samskipti
Að eignast vini
Að líða vel í eigin skinni

Leitað er eftir skoðunum barns við útfærslu stuðnings eftir því sem aldur og þroski leyfir. Stuðningur er veittur bæði innan heimilis og utan.

Á ég rétt á stuðningi?

Til að eiga rétt á stuðningi þurfa foreldrar, forsjáraðilar og börn að uppfylla eftirfarandi skilyrði:

Eiga lögheimili í Reykjavík.
Vera metin í þörf fyrir stuðning samkvæmt reglum um stuðning við börn og fjölskyldur þeirra.
Foreldrar skulu hafa forsjá með þeim börnum sem stuðningur snýr að.

Hvernig nálgast ég stuðning?

Fyrsta skref foreldra og forsjáraðila er að panta viðtal við ráðgjafa á þjónustumiðstöð. Þar er farið yfir stöðu og þarfir fjölskyldunnar. Í framhaldinu er tekin sameiginleg ákvörðun um hvaða stuðningur hentar fjölskyldunni og umsókn undirrituð ef við á.

Ef þú ert ekki viss um til hvaða þjónustumiðstöðvar þú átt að leita geturðu hringt í þjónustuver Reykjavíkurborgar í s. 4 11 11 11 eða skoðað kort af hverfaskiptingu þjónustumiðstöðva.

Hvað gerist næst?

Þegar undirrituð umsókn um stuðning liggur fyrir er næsta skref formlegt mat á stuðningsþörf fjölskyldunnar. Matið tekur mið af stöðu fjölskyldunnar með tilliti til eftirfarandi þátta:

Færni, geta og styrkleikar
Félagslegar aðstæður og tengslanet
Virkni og þátttaka í samfélaginu
Hvaða afleiðingar töf á stuðningi hefur fyrir fjölskylduna
Annar stuðningur

Við formlegt mat á stuðningsþörf er litið til heildaraðstæðna fjölskyldunnar. Ef matið leiðir í ljós að ekki er talin þörf á stuðningi er umsókn synjað. Sé umsókn samþykkt vinnur ráðgjafi stuðningsáætlun í samvinnu við fjölskylduna.

Stuðningsáætlun byggir á formlegu mati á stuðningsþörf. Í áætluninni er eftirfarandi spurningum svarað:

Hvaða stuðningur er veittur?
Hver eru markmiðin?
Hvernig er árangur metinn?
Hvernig er stuðningi háttað?

Hvar fæ ég frekari upplýsingar?

Frekari upplýsingar veitir starfsfólk þjónustumiðstöðva. Þar geturðu einnig fengið upplýsingar um stöðu þinna mála og umsókna.

Einnig er hægt að hringja í þjónustuver Reykjavíkurborgar í s: 4 11 11 11.

Hvaða lög og reglur gilda um stuðning við börn og fjölskyldur?

Stuðningur við börn og fjölskyldur er veittur á grundvelli eftirfarandi laga og reglna: