Mannréttinda- og lýðræðisskrifstofa |

Mannréttinda- og lýðræðisskrifstofa fylgir eftir ákvörðunum mannréttinda-, nýsköpunar- og lýðræðisráðs. Ráðið starfar í umboði borgarráðs Reykjavíkur og mótar stefnu, tekur ákvarðanir og gerir tillögur til borgarráðs í mannréttindamálum.

Mannréttinda- og lýðræðisskrifstofa sér um að framfylgja mannréttindastefnu borgarinnar. Mannréttindastefnan byggir á mannréttindum og jafnræðisreglunni. Jafnræðisreglan eða bann við mismunun er ein grunnhugmynd mannréttinda. Hana er að finna í helstu mannréttindasamningum og í 65. gr. stjórnarskrárinnar en reglan kveður á um að bannað sé að mismuna fólki á grundvelli tiltekinna eiginleika þess eða af öðrum ómálefnalegum ástæðum.

Mannréttinda- og lýðræðisskrifstofa veitir fræðslu um mannréttindastefnu borgarinnar sem og um önnur mannréttindamál, en hægt er að senda fyrirspurnir og fræðslubeiðnir á mannrettindi@reykjavik.is. Mannréttindastjóri er Anna Kristinsdóttir.

Bæklingur um mannréttindastefnuna á bæði íslensku og ensku.

Bæklingur um mannréttindastefnuna á bæði íslensku og pólsku.

Aðgerðaráætlun í mannréttinda- og lýðræðismálum 2019 til og með 2022.

Helstu verkefni mannréttinda- og lýðræðisskrifstofu eru:

Annast framkvæmd mannréttindastefnu
Vinna ásamt mannréttinda-, nýsköpunar- og lýðræðisráði að aðgerðaáætlunum í mannréttinda- og lýðræðismálum
Fylgja eftir ákvörðunum mannréttinda-,nýsköpunar og lýðræðisráðs, öldungaráðs, fjölmenningarráðs, ofbeldisvarnarnefndar og aðgengis- og samráðsnefndar í málefnum fatlaðs fólks.
Eiga samvinnu við félög og önnur sveitarfélög í málum sem mannréttindastefna Reykjavíkurborgar nær til
Eiga samráð við tilnefnda mannréttindafulltrúa á sviðum borgarinnar
Efla samráð í mannréttinda- og lýðræðismálum innan borgarinnar
Eiga frumkvæði að verkefnum sem tryggja mannréttindi borgarbúa
Standa vörð um að borgarbúum sé ekki mismunað vegna uppruna, þjóðernis, tungumáls, litarháttar, trúarbragða, lífs-, stjórnmálaskoðana, trúleysis, kyns, kynhneigðar, kynvitundar, kyntjáningar, kyneinkenna, aldurs, fötlunar, holdafars, líkamsgerðar, heilsufars, atgervis eða annarrar stöðu.

Á mannréttinda- og lýðræðisskrifstofu eru vistuð, auk mannréttinda-, nýsköpunar- og lýðræðisráðs eftirtalin ráð og nefndir:

Aðgengis- og samráðsnefnd í málefnum fatlaðs fólks. Verksvið hennar er að vera borgarstjórn, nefndum og ráðum Reykjavíkurborgar til ráðgjafar um málefni og hagsmuni fatlaðs fólks í aðgengismálum í víðum skilningi, við mótun allrar þjónustu borgarinnar sem snýr að fötluðu fólki og eftir atvikum öðrum hagsmunamálum fatlaðs fólks.
Fjölmenningarráð. Verksvið þess er að vera borgarstjórn og nefndum og ráðum Reykjavíkurborgar til ráðgjafar um málefni hagsmuni borgarbúa sem eru innflytjendur.
Íbúaráð. Verksvið þeirra er að vinna að auknu íbúalýðræði innan borgarinnar og eru mikilvægur samráðsvettvangur Reykjavíkurborgar.
Ofbeldisvarnarnefnd. Verksvið hennar er að vera borgarstjórn og nefndum og ráðum Reykjavíkurborgar til ráðgjafar um aðgerðir og viðbrögð við ofbeldi í samfélaginu.
Öldungaráð. Verksvið þess er að vera borgarstjórn, nefndum og ráðum Reykjavíkurborgar til ráðgjafar um málefni og hagsmuni borgarbúa sem er 67 ára og eldri.