Clone of Viðburðir og hátíðir
Reykjavíkurborg stendur fyrir fjölda viðburða og hátíða allt árið um kring. Einnig hefur borgin komið að og styrkt ýmis hátíðarhöld í gegnum árin. Skrifstofa menningarmála sér um framkvæmd á borgarhátíðum Reykjavíkur og undirbúning, framkvæmd og kynningu á viðburðadagatali borgarinnar auk þess að sinna samráði og ráðgjöf við skipuleggjendur viðburða.
Borgarhátíðir
Borgarhátíðir Reykjavíkur eiga stóran þátt í því að glæða borgina lífi og þjappa borgarbúum saman. Meðal fjölsóttustu viðburða borgarinnar eru:
Menningarnótt er afmælishátíð Reykjavíkurborgar og vafalítið hápunktur viðburðahalds í Reykjavík. Menningarnótt er hátíð sem allir borgarbúar skapa og upplifa saman, úti á torgum og götum miðborgarinnar, í bakgörðum og söfnum, fyrirtækjum og ekki síst í húsunum í bænum.
Markmið Menningarnætur er að hvetja borgarbúa til þátttöku með því að beina kastljósinu að því fjölbreytta og ríkulega framboði af menningarviðburðum og kraftmikilli menningarstarfsemi sem borgin hefur upp á að bjóða. Dagskráin er gestum að kostnaðarlausu og þar með séð til þess að allir gestir geti notið kraftmikils menningarlífs og góðrar samveru.
Reykjavíkurborg sér um skipulagningu hátíðahalda fyrir 17. júní í Reykjavík ár hvert. Fyrst var haldið opinberlega upp á 17. júní árið 1911, á 100 ára afmæli Jóns Sigurðssonar, en 17. júní varð ekki þjóðhátíðardagur Íslendinga fyrr en með stofnun lýðveldisins árið 1944. Í Reykjavík hefur þjóðhátíðardagurinn verið haldinn hátíðlegur með sérstakri hátíðadagskrá á Austurvelli, skrúðgöngum, barnaskemmtunum, íþróttum, tónleikum og dansleikjum og fer dagskráin að mestu fram utanhúss.
Vetrarhátíð er haldin árlega í öllum sex sveitarfélögum höfuðborgarsvæðisins. Þessi hátíð ljóss og myrkurs samstendur af þrem meginstoðum: Safnanótt, Sundlauganótt og ljósalist ásamt yfir 150 viðburðum þar sem fjöldi listamanna tekur þátt í að skapa einstaka stemningu í borginni.
Listahátíð – styrkt af Reykjavíkurborg
Listahátíð í Reykjavík er þverfagleg listahátíð með áherslu á nýsköpun og hefur verið leiðandi afl í íslensku menningarlífi frá stofnun árið 1970. Listahátíð í Reykjavík er haldin á tveggja ára fresti og leitast við að koma stöðugt á óvart, endurspegla fjölbreytileika mannlífsins, vera sýnileg í borginni og teygja sig jafnframt út fyrir borgarmörkin.
Barnamenningarhátíð í Reykjavík er ein af megin þátttökuhátíðum borgarinnar. Vettvangur hátíðarinnar er borgin öll og fara fjölbreyttir viðburðir fram í grunnskólum, leikskólum, frístundamiðstöðvum og listaskólum hennar. Jafnframt er boðið upp á dagskrá í Ráðhúsi Reykjavíkur, Hörpu og lista- og menningarstofnunum borgarinnar. Leiðarljós hátíðarinnar eru gæði, margbreytileiki, jafnræði og gott aðgengi að menningu barna, með börnum og fyrir börn.