Hver getur sótt um tóbakssöluleyfi?

Skilyrði fyrir útgáfu tóbakssöluleyfis er að viðkomandi sé skráður skv. lögum nr. 28/1998 um verslunaratvinnu. Þetta þýðir að að kennitala umsækjanda (lögaðili/einstaklingur) um tóbakssöluleyfi þarf að vera skráð í fyrirtækjaskrá/firmaskrá.  

Hvernig er sótt um tóbakssöluleyfi?

Sótt er um á rafrænu umsóknareyðublaði

Hvað kostar tóbakssöluleyfi?

Gjald fyrir tóbakssöluleyfi og eftirlit vegna tóbakssölu er innheimt skv. gjaldskrá Heilbrigðiseftirlits Reykjavíkur.

Afgreiðsla tóbakssöluleyfa

  1. Umsókn móttekin - Þegar rekstraraðili hefur sent inn umsókn í gegnum mínar síður tekur heilbrigðisfulltrúi umsókn til afgreiðslu. Uppfylli rekstraraðili skilyrði er umsóknin tekin til afgreiðslu, að öðrum kost er umsækjanda leiðbeint um það sem upp á vantar.
  2. Umsóknin afgreidd - Umsóknin er lögð fyrir afgreiðslufund heilbrigðiseftirlitsins til samþykktar. Afgreiðslufundir eru vikulega á þriðjudögum. 
  3. Svar sent - Heilbrigðiseftirlitið sendir síðan tilkynningu um samþykkt leyfisins ásamt reikningi fyrir leyfið. Tóbakssöluleyfi tekur gildi þegar reikningur fyrir leyfið hefur verið greiddur og er þá leyfisbréfið sent til leyfishafa. Óheimilt er að selja tóbak fyrr en leyfi hefur tekið gildi. Gildistími tóbakssöluleyfa er 4 ár.

Reglur um sölu tóbaks

Eftirfarandi reglur gilda um sölu á tóbaki: 

  • Gilt tóbakssöluleyfi skal að vera til staðar.
  • Tóbak má hvorki selja né afhenda einstaklingum yngri en 18 ára. Bann þetta skal auglýst með áberandi hætti þar sem tóbak er selt. 
  • Tóbaki og vörumerkjum tóbaks skal komið þannig fyrir á útsölustöðum að það sé ekki sýnilegt viðskiptavinum. 
  • Þeir einir sem orðnir eru 18 ára mega selja tóbak.

Heilbrigðiseftirlitið hefur eftirlit með að farið sé eftir reglum um sölu og auglýsingu tóbaks. Söluaðilar geta búist við að komið sé í sérstakar eftirlitsferðir vegna tóbakssölu. Innheimt er gjald fyrir eftirlitsferðir skv. gjaldskrá. 

Fyrirspurnir eða ábendingar

Vinsamlega hafðu samband við Heilbrigðiseftirlit Reykjavíkur, hafirðu ábendingu eða fyrirspurn til varðandi tóbaksleyfi eða hringja í Þjónustuver Reykjavíkurborgar í síma 411 1111.